Tag

, ,


Parjolo au marsantabi sapulu mangadopkon ula kahanggi, mora, anakboru. Satorusna hatobangon dohot na i patobang-tobangon, umumna na marhadir di majelis paradatan on.
Mangiuthon umur dohot pamatang ni anak nami si … patut dohot tama ma ibana mamolus adat matobang. Ima diari na solpui marlao-lao ma ibana tu jae tu julu manjalaki dongan siangkup markaya donganna matobang.
Satibona ibana di alaman ni huta … manatap mada ibana tu jae tu julu, impol mada mata manaili adong ma na solong ni matana, na tumbuk tupa tu pangarohaina, dongan rongkap ni tondina ima jagar-jagar ni mora nami danak na dibagason.
Disi taringot mada ibana dipituah ni na tobang-tobang, muda itinggalkon huta niba, ama dohot ina, songoni koum ula kahanggi ditopotkon huta ni halak, ama dohot ina ma parjolo, songoni muse koum kahanggi. Ulang doma ibaon jomak-jomak so marburi, sosot-sosot doma ibaon margondang dalan marbou-bou lao tu tapian, batuk-batuk laos tu bagas, anso ulang ibaon tarsilandit dinaporkot, tarkulaping di nanapa harana hutaon ( … ) inganan ni sada raja, namarpantak pago-pago marranting marungga soit songoni musengan jagar-jagar ni mora, sung doon songon salak dibonana na landing didurina na laungi dibulungna.
Didia rura, disi tubu mali-mali Didia huta, disi adong kahanggi
Dijalakan doma jolo kahanggi niba anso dioloskon diibana maksud tujuan niba, ima na manyangkutkon hata tu jagar-jagar ni mora, botima pamikiran ni anak nami di ari na solpui.
Ditopotkon na ma rupa kahanggina ima ula-ula sisolkot dibagason, onma anakon jasi … salaho dioloskon maksud tujuanna tu kahanggi namion, ima na manyangkutkon hata tu jagar-jagar ni mora nami ima bagason.
Satorusna langka ma kahanggi namion manopotkon jagar-jagar ni mora, satorusna tu mora nami dibagason. Disampeon hajat dohot tona ni anak nami ima na manyangkutkon hata. Disi mudah-mudahan dapot do panamana dohot parsarumbukanna. Tarsangkut ma hata paradatan ni anak nami tu jagar-jagar ni mora nami dibagason.
Marsimulak muli anak nami, manjamitahonna di simatobangna ima abang i jasi … bahaso ibana madung manyangkutkon hatana tu jagar-jagar ni mora dibagason. Mambege jamita ni anaki na tuk godang dohot lomo ni roha ni abangi, sagi rodo hami na markahanggi dilagutkon abangi saloho manjamitahon na di hami, disi mambege jamita ni abangi na tuk godang dohot lomo ni roha nami.
Satorusna diari nasolpui hami suru do pasuruon nami manopotkon mora nami tu bagason buat manangkasi obar kobar ni daganakon, sanga natutu napeto do sanga na gonjak sianyang. Disi mangalus do mora nami natutu napeto do ning ibanana. Marsimulak muli pasuruan nami, manjamitahon na di hami bahaso obar kobar ni daganaki na tutu peto do. Mambege jamita nisuruan nami i na tuk godang ni roha nami.
Satorusna di ari na solpui, madung ami lagutkon do sude ula kahanggi, mora, dohot anak boru nami. Hami jamitahon diibana satontang hata sangkut ni daganak, sanga na turut do ibana margodang marlomo ni roha. Disi mudah-mudahan turut do ibana margodang jana marlomo ni roha.
Baen hami boto da singkoru domu-domu, ula-ula sisolkot dibagason, on ma kahanggi namion. On ma abangon jasi … hami topotkon ibana salaho marpokati, sanga andigan maso dohot waktuna mambaen (padomu) hata paradatan ni daganak i.
Putus ni tahi dohot pokat nami, on ma diari sadarion. Jadi on ma diaroro namion tampak torop, marula markahanggi markahanggi maranak boru, nadisuru ni ula kahanggi mora dohot anakboru nami sian alaman ni Huta … (Kampung ni calon alak lai). Na dioban ni kahanggi namion ula-ula sisolkot dibagason, manyuruk pamispisan ni mora nami tu bagason. Hombang ni burangir nami marula markahanggi maranak boru, manyapai obar kobar ni daganaki ma hamion di mora nami, sanga na tutu napeto doi sanga na leng togu daya…?
Antong muda leng na tutu napeto do ning mora nami, leng na togu daya, na patobang hatai ma hamion. Muda ngada ning mora nami na tutu na peto, hamion manjalang tahi dohot pokat sanga songon dia dalan panamana.
Saima jolo hata sian au, baen dison dope kahanggi anak boru, tarlobi-lobi kahanggi nami ula-ula sisolkot dibagason, ibana ma patama patupa hataon mangadopkon mora nami dohot na tobang-tobangan. Botima, usudahi ma dohot assalamu ‘alaikum warohmatullohi wabarokatuh.
Balasan (Mora)
Ia taringot obar kobar ni daganakon, anggo sapanjang pambotoan nami ngada dope martukar maruba, leng na tutu na peto dope leng na togu daya. Onpe matobang ma hataon songon di ape hajat dohot maksud muyu na tarpaujung kita mai. Botima.