Tag

, ,


Parjolo au marsantabi sapulu mangadopkon sude ula kahanggi, mora, anakboru. Tarlobi-lobi mora ni mora, hatobangon dohot nai patobang, umumna na marhadir di majelis paradatan on.
Disurdu burangir nami nangkin diruas na partama ima satontang namanyapai obar kobar ni daganaki sanga natutu napeto do sanga na leng togu daya. Madung mangalus nangkin mora nami leng natutu napeto do ning ibana leng na togu daya, hami sambut nangkin margodang ni roha. Tai baen harana adong dope hata nangkan sombahonkon nami tu mora nami dohot na tobang-tobangon ima nangkin anso marsapa hami sanga pade dope hami hombangkon burangir nami, mangalus nangkin mora nami ngada maua ning ibana.
Jadi on ma hata ni burangir nami diruas na paduanaon, namangido upok ni tobu suanon mada hamion, andor mangolu parsiraisan dohot titian batu naso ra buruk di mora nami. Godang harapan nami pangidoan namion dapot ma nian dikabulkon mora nami. Botima da hatana.
Balosna
Ia taringot na dipangido muyuon lopuk ni tobu suanon andor mangolu parsiraisan titian batu naso ra buruk, anso diboto hamu da lopuk ni tobu suanon i ima gadis ni mora muyuon mai. Andor ngolu parsiraisan i, parkouman naso markaputusan madai tu mora muyu tu bagason, titian batu naso ra buruk, ima parkahanggian.
Jadi onpe anso tarlehen pangidoan muyuon, angkon na marsyarat marrukun do on, angkon na sanggup hamu manggargari buntu-buntu, manyopsopi rura-rura dohot mangulosi tungko-tungko anso tarlehen pangidoan muyuon. Botima